काठमाडौं । १० दिनसम्म मौन ध्यान गर्ने योजनासहित गत आइतबार नेपाल आएका बलिउड अभिनेता अमिर खान पाँच दिनमै ध्यान भंग गरेर स्वदेश फर्केका छन् । उनी इन्डिगो एयरलाइन्सबाट भारत फर्किएका हुन् ।
पाँच दिनसम्म पूर्णरूपमा मौन ध्यान गरेका आमिरले शुक्रबार बिहान काठमाडौं बूढानीलकण्ठस्थित नेपाल विपश्यना ध्यान केन्द्रबाट बिदा लिएका हुन् । बाँकी पाँच दिनको ध्यान उनले आफ्नो देशमा गर्ने जनाइएको छ ।
गत आइतबार काठमाडौं आएका उनी सोही बेलुकाबाट मौन ध्यानमा जोडिएका थिए । नियमअनुसार साँझ एक छाक मात्र खाएर पाँच दिनसम्म मौन बस्न सफल आमिरले शुक्रबार बिहान ध्यान तोडेको केन्द्रले जनाएको छ ।
विशेष कामले गर्दा उनले बीचमै ध्यान छाडेर मुम्बई फर्कनुपरेको बताइएको छ । तर, त्यसबारे आमिरले कुनै खुलासा गरेका छैनन् ।
दोस्रो पत्नीसँग पनि सम्बन्ध बिच्छेद भएपछि एक्लो भएका अमिर मानसिक तनावमा रहेको बताइएको छ । उनका पछिल्ला फिल्मसमेत एकपछि अर्को गर्दै व्यावसायिकरूपमा असफल भएका छन् ।
