सर्लाही । तराई मधेसमा दुई दिनदेखि घाम लागेको छैन । बाक्लो हुस्सु लागेर स्याँठ चल्दा नागरिक चिसोले कठ्याङ्ग्रिएका छन् ।
पालिकाले न्यानो सामग्री वितरण नगर्दा विपन्न परिवारलाई चिसोले झनै समस्या थपेको छ । चिसो बढेसँगै न्यानोको जोहो गर्न नसक्ने तराई मधेकिा नागरिक कठ्याङ्ग्रिनु परेको हो ।
शरिर ढाक्ने न्यानो कपडा र ताता ओढ्नेओछ्याउने नहुँदा मधेसका धेरै परिवार पराल ओछ्याएर सुत्न बाध्य छन् । चिसोले बालबालिका, ज्येष्ठ नागरिक र अपाङ्गता भएका नागरिकलाई झन् धेरै समस्या भएको छ ।
विद्यार्थीलाई विद्यालय जान तथा मजदुर र किसानलाई नियमित काममा निस्कन गाह्रो परिरहेको छ ।
चिसोले जनजीवन कष्टकर हुँदा पनि पालिकाले कुनै वास्ता नगरेको सर्लाहीको बसबरिया गाउँपालिकाको कार्यालयसँगै रहेको मुसहर बस्तीका ६५ वर्षका मन्मादेवी माझीले गुनासो गर्नुभयो । तर अझै पालिकाले चिसो प्रभावितलाई न्यानो प्रदान गर्न पहल गरेका छैनन् ।
राहतका लागि पालिका आफै गैर–सरकारी संस्थाको मुख ताकेर बसेका छन् ।
