काठमाडौं । नेकपा एकीकृत समाजवादी पार्टीको संसदीय दलको बैठक आज सोमबार(आज) बस्दै छ । पार्टी मुख्यालयमा दिउँसो १ बजे बैठक बस्न लागेको महासचिव डा. वेदुराम भुषालले जानकारी दिनुभयो ।
सो दलको हिजो सचिवालय बैठक बसेको थियो । सोही बैठकले संसदीय दलको बैठक बोलाउने निर्णय गरेको थियो ।
दलको बैठकले संसदीय दलको नेता चयन गर्ने र आगामी सरकार गठनमा दलको तर्फबाट खेलिने भूमिका बारेमा निर्णय लिने सो दलले जनाएको छ ।
संसदीय दलको नेतामा अध्यक्ष माधवकुमार नेपाल सर्वसम्मत चयन हुने करिब पक्का रहेको बैठकमा समसामयिक राजनीतिक विषयमा पनि छलफल हुने महासचिव भुषालले बताउनुभयो । एकीकृत समाजवादी राष्ट्रिय दल बन्न नसके पनि प्रत्यक्ष निर्वाचित १० सांसद यो दलसँग रहेका छन् । राष्ट्रपति विद्यादेवी भण्डारीले सात दिनको समय दिएर हिजो सरकार गठनको आव्हान गरेपछि सबै दलको बैठक नियमित बस्न थालेको छ ।
