काठमाडौं । सर्वोच्च अदालतले रेशम चौधरीलाई जन्मकैद गर्ने फैसला सदर गरेपछि नागरिक उन्मुक्ति पार्टी आन्दोलित भएको छ । पार्टीका सल्लाहकार चौधरीको रिहाईको माग गर्दै आज (जेठ ३ गते) देखि आन्दोलन गर्ने सो पार्टीले घोषणा गरेको हो ।
पार्टीका बरिष्ठ उपाध्यक्ष दामोदर पण्डितद्वारा जारी प्रेस विज्ञप्तिमा राँके जुलुस, कोणसभादेखि बन्द हड्तासम्मका कार्यक्रम घोषणा गरिएका छन् । टीकापुर घटना राजनीतिक भएको बताउँदै नागरिक उन्मुक्ति पार्टीले राजबन्दीहरुलाई फौजदारी अभियोगमा जेल सजायँ गर्न नमिल्ने जिकिर गरिएको छ ।
पार्टीको केन्द्रीय कमिटीको बैठकपछि जारी विज्ञप्तिमा भनिएको छ, ‘यदि रेशमलाल चौधरी लगायतका राजबन्दीहरु हत्यारा हुन् भने फासी दिने ऐन बनाएर रेशम चौधरीलाई फासी दिए हुन्छ । सरकारले लाल आयोगको प्रतिवेदन सार्वजनिक गर्नुपर्ने माग समेत नागरिक उन्मुक्ति पार्टीले दोहोर्याएको छ । बैठकपछि जारी विज्ञप्तिमा भनिएको छ, ‘यदि लाल आयोगको प्रतिवेदन सरकारले सार्वजनिक गरेन भने हाम्रो पनि (आन्दोलनबाहेक) अर्को विकल्प छैन ।’
कैलालीको टीकापुरमा २०७२ भदौ ७ गते भएको हिंसात्मक घटनामा ९ जना सुरक्षाकर्मी र एकजना नावालकको ज्यान गएको थियो । यस घटनामा रेशमलाल चौधरीसहित ४ जनालाई जन्मकैदको सजायँ भएको छ भने चार जनालाई १० वर्ष कैदको सजायँ भएको छ । त्यसैगरी थप ८ जनालाई पाँच वर्ष कैद सजायँ तोकिएको छ । बाँकी चारजनालाई ३ वर्ष र एकजनालाई अदालतले ६ महिना कैद सजाँय तोकेको छ । यस घटनामा संलग्न रहेको आरोप लागेका २९ जना प्रहरीको फरार सूचीमा छन् ।
मंगलबार सर्वोच्च अदालतले रेशमलाल चौधरी लगायतका बन्दीहरुको जन्मकैदको सजायँ सदर गर्ने फैसला सुनाएपछि नागरिक उन्मुक्ति पार्टी आन्दोलित बनेको हो ।
सर्वोच्च अदालतको फैसलाको भोलिपल्ट बसेको पार्टीको बैठकले भनेको छ, ‘हिजोको सम्मानित अदालतको फैसला, न्यायमुर्तिहरुको निर्णय स्वीकार्य छ तर यो राजनीतिक मुद्दा अदालती होइन । आजका सबै राजनीतिक दलका शीर्ष नेतृत्वले आफ्नो विगत फर्केर हेर्न अनुरोध गर्दै टीकापुर घटना राजनीतिक घटना भएकाले राजनीतिक हिसाबले हल गर्न अनुरोध गर्दछौं ।’
