काठमाडौं । सत्ता साझेदार कांग्रेसको पदाधिकारी बैठकमा मन्त्रिपरिषद् विस्तारबारे छलफल भएको छ । शनिबार कांग्रेस पदाधिकारी बैठक सभापति शेरबहादुर देउवाको निवास धुम्बाराहीमा बसेको थियो ।
संसदमा पेस भएको सत्य निरुपण विधेयक अगाडि बढाएर टुंगोमा पुग्नेबारे छलफल भएको पार्टी प्रवक्ता डा. प्रकाशशरण महतले बताए । प्रमुख सचेतक रमेश लेखकले संसदमा पेस भएका विधेयकबारे बैठकमा जानकारी गराएका थिए । बैठकमा उपसभापति पूर्णबहादुर खड्काले १० पुस पश्चात् अहिलेसम्मको राजनीतिक घटनाक्रम ब्रिफ गरेका थिए ।
८ मन्त्रालयमा काँग्रेसको दाबी
नेपाली काँग्रेसले आठ मन्त्रालयमा दाबी गरेको छ । काँग्रेसले सात मन्त्रालय पाउने पक्का जस्तै भएको उपसभापति पूर्णबहादुर खड्काले जानकारी दिए । सत्तारुढ दलहरू सात मन्त्रालय दिनका लागि तयार भए पनि काँग्रेसले आठ मन्त्रालय दाबी गरेको उपसभापति खड्काले बताए ।
