काठमाडौँ । प्रधानमन्त्री पुष्पकमल दाहाल ‘प्रचण्ड’लाई भेट्न नेपाली काँग्रेसका सभापति शेरबहादुर देउवासहित शीर्ष नेताहरू बालुवाटार पुगेका छन्। राष्ट्रपतिको निर्वाचनका विषयमा छलफल गर्न आइतबार बेलुका नेताहरू प्रधानमन्त्री निवास पुगेका हुन् ।
काँग्रेस सभापति देउवा, वरिष्ठ नेता रामचन्द्र पौडेल, उपसभापति पूर्णबहादुर खड्का, महामन्त्री गगन थापा र नेता कृष्णप्रसाद सिटौला बालुवाटार पुगेका हुन् ।
एक नेताका अनुसार केहीबेरदेखि प्रधानमन्त्री दाहालसहित माओवादी नेताहरू र काँग्रेस नेताहरुबीच छलफल चलिरहेको छ । भेटमा राष्ट्रपतिको निर्वाचन र भावी राजनीतिक कोर्सका विषयमा सहमतिको प्रयास हुने ती नेताको भनाइ छ ।
त्यसबारे यसअघि नेताहरुबीच एक्ला–एक्लै भेटघाट र छलफल भइसकेको छ । प्रधानमन्त्री दाहालले त्यसबारे पार्टीभित्र छलफल गर्न सोमबार अपराह्न पदाधिकारी बैठक बोलाएका छन् ।
