काठमाडौँ । कानून, न्याय तथा संसदीय मामिला मन्त्री धनराज गुरुङले भ्रष्टाचारको जरा हल्लिने गरी काम गर्न आवश्यक रहेको बताएका छन् ।
सोमबार काठमाडौँमा सुरु भएको नेपाल ट्रेड युनियन कांग्रेसको ७ औं महाधिवेशनलाई सम्बोधन गर्दै कानून मन्त्री गुरुङले भ्रष्टाचारकै कारण नेपाली जनताको अवस्था बदल्न नसकेको बताए ।
उनले भने ‘ भ्रष्टाचारको जरा हल्लाउने काम तपाईँहरूले गर्न जरुरी छ । नेपाली राजनीतिमा २ वटा वर्ग र २ वटा जीवी छन् । एउटा श्रमजीवी र एउटा पराजीवि छ । पराजीविहरुलाई परास्त नगरेसम्म श्रमजीवीहरूको उत्थान हुन सक्दैन । ट्रेड युनियन आफ्नो अधिकार कानुनसँग मागेर हैन खोसेर लिन्छ । अब खोसेर अगाडि बढ्नुस् भनेर निर्णय गर्न चाहेँ । २०४६ सालको जनआन्दोलन पछि पटक पटक हामी अगाडि बढ्यौं ।
हामीले पटक पटक व्यवस्था बदल्यौं । तर भ्रष्ट प्रवृत्तिको कारणले नेपाली जनताको अवस्था बदल्न सकेनौं । हामी भ्रष्ट प्रवृत्तिलाई बदल्न सकेनौं । भ्रष्ट प्रवृत्तिलाई बदल्न आवश्यक छ । यसको अन्त्य गर्न आवश्यक छ । त्यसै कारणले गर्दा जात, धर्म, वर्ण, क्षेत्र, राजनीति, पार्टी र राष्ट्रियता हुँदैन भन्ने मान्यता स्थापित गर्नको लागि पहिला ट्रेड युनियन अगाडि बढ्न आवश्यक छ ।
