लन्डन । विश्व स्वास्थ्य संगठन (डब्लुएचओ) ले कोभिड–१९ महामारीको नयाँ भेरियन्ट ‘जेएन.१’ र इन्फ्लुयन्जाको संक्रमण फेरि बढन थालेको बताएको छ ।
डब्लुएचओले कोभिड–१९ महामारीबाट बच्न सतर्कता अपनाउन पनि भनेको छ । खास गरी दक्षिणपूर्वी एसियाली देशहरुमा कोभिड महामारीको नयाँ संक्रमणका कारण श्वासप्रश्वाससम्बन्धी समस्या बढेको भन्दै डब्लुएचओले सुरक्षाका उपाय अपनाउन भनेको हो ।
नयाँ भेरियन्टको जोखिम न्यून हुने भए पनि संक्रमणबाट बच्न नियमित निगरानी र सतर्कता अपनाउन आवश्यक रहेको डब्लूएचओका दक्षिणपूर्वी एसिया क्षेत्रीय निर्देशक डा.पुनम क्षेत्रपाल सिंहले बताए ।
जाडो मौसम हुने मुलुकहरुमा कोभिड–१९ को नयाँ भेरियन्ट फैलने क्रम तीव्र रहेकाले समस्या देखिने बित्तिकै चिकित्सकसँग परामर्श लिन भनेका छन् ।
कोभिड–१९ को नयाँ भेरियन्ट भारतमा फैलँदो क्रममा छ । नेपालमा पनि कोभिड–१९ का संक्रमित बढ्न थालेका छन् । तर, हालसम्म नयाँ भेरियन्ट भने फेला परेको छैन ।
